အရူးထပြီး လမ်းပေါ်ထွက်အော်နေကြတော့လည်း နိုင်မှာမှမဟုတ်တာဆိုတဲ့လူတွေကို ပညာပြန်ပေးလိုက်တဲ့မိန်းကလေး

“ဟဲ့..ဘယ်သွားမလို့လဲ””ဆန္ဒသွားပြမလို့”

 

Shoe ဖိနပ်ကြိုးချည်နေတုန်း ရောက်လာတဲ့ သူငယ်ချင်းမလေးရဲ့အမေးကို မော့မကြည့်ဘဲ ဖြေလိုက်တယ်။

“အားနေရင် အိမ်ထဲမှာအိပ်နေစမ်းပါဟယ်၊အရူးထပြီး လမ်းပေါ်ထွက်အော်နေကြတော့လည်း နိုင်မှာမှမဟုတ်တာ၊ဟိုကပစ်သတ်လို့ သေရတာပဲရှိမယ်”

 

“အေး..ရင်းလိုက်ရတဲ့အသက်တွေအတွက် ပိုပြီးတော့ထွက်ရမှာပဲ၊နိုင်မှာမဟုတ်ဘူးလို့ မပြောနဲ့ ၊ နိုင်တဲ့အထိ တိုက်မှာ”

“ဘာနဲ့တိုက်မှာလဲ၊နင်တို့ လိပ်ခေါင်းထွက်အောင်အော်နေလည်း အလကားပဲ၊ သူပြောသလို တစ်နှစ်စောင့်ကြည့်လိုက်ပေါ့၊တစ်နှစ်ပြည့်ရင် ရွေးကောက်ပွဲပြန်လုပ်ပေးမယ် ပြောထားတာပဲဟာ၊အဲဒီအချိန်မှ ကတိမတည်ရင် အားလုံးဝိုင်းအော်ကြပေါ့..”

ကြိုးချည်ပြီးသွားတဲ့ဖိနပ်ကို နေသားကျအောင်ခါလိုက်ရင်း သူ့မျက်နှာကို တည့်တည့် ပြန်ကြည့်ဖြစ်တယ်။

“အင်း..ထားပါ၊ ဒါနဲ့ ဟိုဘက်ရပ်ကွက်က ကျော်ကြီး နင့်ကိုအဖြေတောင်းတာ ငြင်းလိုက်တယ်ဆို၊သူ့ကို လက်ထပ်ဖို့တောင်းဆိုတာကို နင်ကအဖက်မလုပ်ဘူးဆို..”

 

“ဟဲ့ ဒီလို ဆေးသမား အရက်သမား လူရမ်းကားကို ငါကအဖက်လုပ်စရာလား၊ ထောင်ထွက်ကို”

“လက်မခံရင် ကားတင်ပြေးမှာလို့ပြောနေတယ်နော်၊ အတင်းအဓမ္မအနိုင်ကျင့်ယူရင် နင်ဘာလုပ်လို့ရမလဲ၊ သူကဇနဲ့ဟ၊အဖော်လူမိုက်တွေလည်းရှိတယ်၊အင်အားမမျှဘူးလေ”

 

“မမျှလည်း အသေခံပြန်ချမှာပဲ၊ဒင်းလိုကောင်မျိုးတော့ မယူဘူး”

“ပြန်ချလည်း နင်နိုင်မှာမှ မဟုတ်တာ”

“ဟဲ့ မနိုင်ဘူးဆိုတိုင်း ကြယ်သီးအဆင်သင့်ဖြုတ် ငြိမ်ခံပေးနေရအောင် ငါက မိန်းမပျက် မဟုတ်ဘူး၊ အသက်နဲ့ရင်းပြီး ရသလောက်တော့ ပြန်လုပ်မှာပဲ၊ဒီလိုကောင်လက်ထဲတော့ ဘဝအပျက်မခံဘူး”

 

သူ့အဖြေကိုကြားတော့ အသံထွက်အောင်ရယ်မိရော..။

“ဘာဖြစ်လဲ၊ သူနင့်ကို လူသိရှင်ကြားယူမှာပဲဟာ၊ တကယ်လို့ မကောင်းရင်လည်း တရားဝင်ပြန်ကွာရှင်းပေးပါ့မယ်လို့ အာမခံတယ်လေ၊တစ်နှစ်လောက် ပေါင်းကြည့်ပေါ့၊နင့်ကိုချစ်တဲ့စိတ်နဲ့ သူ့အကျင့်တွေပြင်ချင်ပြင်မှာပေါ့၊ မကောင်းရင် ကွာလိုက်ပေါ့ ၊ အဲချိန် မကွာပေးရင် ငါတို့လည်း ဝိုင်းပြောပေးမှာပေါ့..”

 

“ဘာ၊ ဘယ်တုန်းကမှ အကျင့်မကောင်းဖူးတဲ့လူကို နောက်ကောင်းချင်ကောင်းလာမှာပေါ့ဆိုပြီး ယူကြည့်ရအောင် ငါကအရူးလား၊ ပေါင်းကြည့်ပြီးမှ မကောင်းလို့မယူတော့ပါဘူး ပြောလို့ရအောင်ကလည်း အဲကောင်က လွယ်လွယ် ပြန်ကွာပေးမယ်တဲ့လား၊ ပြီးတော့ အဲအကောင်က သူ့လက်ထဲက အချိန်တွေမှာ ငါ့ကိုအလှကြည့်ထားမှာမို့လား၊ တစ်နှစ်မပြည့်ခင်ကို ဖွတ်ဖွတ်ညက်ညက်ကြေနေလိမ့်မယ်၊ မတော်လို့ ကလေးပါရသွားရင် ထွက်လာတဲ့ဟာလေးတွေက ပြန်ထည့်လိုမရဘူးဟဲ့ မသာမရဲ့၊ဒါ ဘဝတစ်ခုလုံးနဲ့ဆိုင်တဲ့ကိစ္စဟ၊ငါက လူယုတ်မာရဲ့ မျိုးဆက်ကိုတော့ မမွေးထုတ်ပေးနိုင်ဘူး ”

ဒေါသတကြီးနဲ့ လေသံမာလာတဲ့ သူငယ်ချင်းမကို ကြည့်ပြီး တစ်ချက်ပြုံးလိုက်မိတယ်။

“အေး..နင့်တစ်ယောက်နဲ့ပဲဆိုင်တဲ့ ဘဝတစ်ခုစာအိမ်ထောင်ရေးတောင်မှ လူကောင်းကိုပဲ နင်လိုချင်ရင်၊ လူယုတ်မာကို စောင့်ကြည့်ဖို့ မယုံကြည်နိုင်ရင် မျိုးဆက်ပေါင်းများစွာရဲ့ အနာဂတ်နဲ့ဆိုင်တဲ့ နိုင်ငံအရေးမှာ ငါတို့ကလည်း သမိုင်းမကောင်းတဲ့လူကို အချိန်ပေး စောင့်ကြည့်ဖို့ ယုံကြည်စရာအကြောင်းမရှိဘူး၊ ခု လက်ရှိကိုတောင်မှ ဘာကတိမှမတည်တဲ့၊ပြည်သူကိုငဲ့ညှာမှုမရှိဘဲ သတ်ချင်သလိုသတ်၊ ဥပဒေကိုလည်း ပြင်ချင်သလိုပြင်နဲ့ အမျိုးမျိုးကလိန်ကျနေတဲ့ လူက တစ်နှစ်ပြည့်ရင် ပြန်ပေးမယ်ဆိုတဲ့စကားကို နင်ကဘာကြည့်ယုံနေတာလဲ၊ဒီကြားထဲ သူလုပ်ချင်ရာလုပ် အနိုင်ကျင့်တာကို ငုံ့ခံနေရမှာလား၊ ဒီလို လူယုတ်မာလက်ထဲ နိုင်ငံကို တစ်နှစ်မပြောနဲ့ တစ်ရက်လေးတောင် မထားချင်လို့ အသက်နဲ့ရင်းပြီးပြန်တိုက်ယူနေရတာပဲ၊ ရှင်းလား”

ဒါမှ မရှင်းသေးရင် လူမလုပ်နဲ့တော့။